Acara Partangiangan Bona Taon HKBP Balige

1.    Marende BE. No. 9 : 1 – 2         “Hupuji Holong Ni Rohamu”       BL. 110

Hupuji holong ni rohaMu, O Tuhan Jesus, Rajangki

Tu Ho hulehon ma tondingku, ai i do pinangidoMi

Hu halupahon ma diringku, mamingkir holong ni rohaMu          (jongjong)

Sai dilului Ho do au, au pe huhalungunhon Ho

Ditaiti rohaMi rohangku, di bahen i hulehon do

Dipillit Ho hian tondingku, i pe hutodo Ho Tuhanku.

2. Votum – Introitus

U:        Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano on.

H:         Amen.

U:        Jahowa do situngkol sude angka na naeng tinggang, jala sipahehe sude angka na tungki marroha.

H:       Mangaranap tu Ho do angka mata ni sasudena, jadi di lehon Ho tu nasida sipanganonnasida di tingkina be.

U:         Dibuha Ho do tanganMu pasombu lomo ni roha ni nasa na mangolu.

H:         Na bonar do Jahowa di saluhut angka dalanNa jala basa di bagasan saluhut jadijadianNa i.

U:        Donok do Jahowa di sude angka na manjou Ibana, tongon tahe di sude angka na manjou Ibana di bagasan hasintongan.

H:        Ibana mambahen lomo ni roha ni angka na manghabiari Ibana, jala dibege do angguknasida i, jala dipalua do nasida.

U:       Jahowa do pangondingan ni sude angka na manghaholongi Ibana, jala disiaphon do sude angka parjahat, Haleluya! Martangiang ma hita: Ale Amanami na di banua ginjang, asi ni rohaM do na pataru hami tu taon na imbaru on. Ho do, Debata, na mangaramoti pardalanan ni ngolunami saleleng taon 2014 naung husalpuhon hami. Sai asi ma rohaM di hami, sai unang tulak hami; sai ramoti ma hami nang di taon 2015 on. Pasupasu ma hami di sude angka pangkobasion dohot ulaonnami, asa tongtong marlas ni roha hami mandalani ariari ni ngolunami. Jala songon halak naung manjalo pasupasu sian Ho, sai paingot ma hami asa gabe pasupasu nang tu angka na humalianghami. Tangihon ma tangiangnami on, marhitehite goar ni AnakMu, Tuhan Jesus, Tuhannami, Amen.                    (hundul)

3.    Koor :  1. Jl. Sutomo ;                 2. Maranatha;                     3. Haumabange

4.   Marende BE. No. 755 :1 – 2                 “Haposan Ho Tuhan”                BL.755

Haposan Ho Tuhan hot do holongMu, di las ni roha tingki arsak pe.

Asi ni rohaMi nang pambaenanMu, Ho sipalua pangondingan pe.

Ref:            Haposan Ho Tuhan, haposan Ho Tuhan, ndang na mansohot asi ni rohaM.

Nasa na ringkot di au diparade, tung ala ni asiM do i sude.

Logo ni ari nang rondo ni ari, nang tano, laut, bulan, bintang i.

Sude tinompaMi manghatindangkon, denggan ni basaMi di hami on.

Haposan Ho Tuhan,....d,u.....

5.   Marningot Denggan Basa Ni Debata

U:        Puji ma Debata na manompa saluhutna, puji ma Ibana na mangaramoti ngolunta. Puji ma Ibana, ai ro di saleleng ni lelengna do asi ni rohaNa.

H:        Tung na balga do asi ni rohaM Tuhan, alanii pujionnami ma Ho di tongatonga ni ngolunami.

U:       Hamu angka dongan, tadok ma mauliate ala tongtong do di ramoti Tuhan i hita ganup keluarga, nang angka ianangkon songon i nang angka sisolhottabe saleleng hita mandalani taon 2014 naung salpu i.

H:         Tung na balga do asi ni rohaMi Tuhan, alanii pujionnami ma Ho di tongatonga ni ngolunami.

U:         Di lehon Ibana do di hita angka na ringkot i di ngolunta, ganup ari ganup tingki. Di lehon do di hita gogo, pos ni roha dohot panghirimon laho mangalului ngolungolu.

H:         Tung na balga do asi ni rohaMi Tuhan, alanii pujionnami ma Ho di tongatonga ni ngolunami.

U:       Tutu, ragam do angka na masa na boi mambaen hita mabiar mandalani ngolu  di taon naung tabolus i. Ragam do nang angka na masa na boi mambaen hita marungkil di tongatonga ni parngoluon i. Alai, saluhutna do manumpak tu na denggan di angka na marholong ni roha di Debata. 

H:         Tung na balga do asi ni rohaMi Tuhan, alanii pujionnami ma Ho di tongatonga ni ngolunami.  

U:         Nuaeng, bongot ma hita tu taon 2015 on; sada taon na imbaru, taon parasirohaon

H:         Ale Tuhan, sai asi ma roham di hami

U:       Ndang taboto angka na masa na naeng siadopanta. Ndang adong na hot ianggo na di tano on, tung saluhutna do mubauba. Alai dohononta ma:

U+H:    Sai na donganan ni Debata do hita ganup ari, rasi rasa ro ajal ni hasiangan on. Amen

6.    Koor : 1. Ama Pardede Onan;          2. Ina Ressort;               3. Sangkar Ni Huta I

7.    Marende BE. No. 581 : 2          “Sangap di Jahowa”              BL. 581

Tung so hasuhatan do basaNa i, marhite AnakNa ni lehonNa i.

MudarNa durus do di hau silang i, rara pe dosanta ias dibaen i.

Puji ma Debata, ale manisia, las roham, las roham, somba ma Debata.

Dapothon Jahowa na sun timbul i, marhite AnakNa Tuhan Jesus i.

8.   Epistel

U:  Hata ni Debata na gabe epistel di hita di partangiangan bona taon borngin on, i ma na ni enet sian Pilippi 4 : 4 – 7. Songon on ma didok disi

 H:   Marlas ni roha ma hamu tongtong di bagasan Tuhan i! Huulaki ma mandok: Marlas ni roha ma hamu!

U:   Pabotohon hamu ma habasaronmuna tu saluhut halak! Donok do Tuhan i!

H: Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate!

U: Jala dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus! I do sahatna, martua do angka na tumangihon hata ni Debata, jala na umpeopsa, Amen.

9.    Koor : 1. Dolok Sion;              2. Ama Immanuel Onan Raja;              3. Ina Parari Selasa

10.  Marende BE. No. 753 : 1 + 3            “Di Pardalanan Jesus di jolongku”           BL. 753

Di pardalanan Jesus di jolongku, holong ni tanganMi manogu au.

Nang di ngolungku Ho do sombaonhu, tung sonang mardalan raphon au.

Huboto do tangkas panoguonMu, diiringiring Ho do langkangki.

Sahat ro di ujung ni pardalanhu, togu ma au jonok tu lambungMi.

Patogu ma Tuhan haporseaonhu, asa polin tu Ho manghirim au.

Tu surgo i patulus pardalanhu, TondiMi maringan ma di au.

Huboto do tangkas panoguonMu.....d,u...

11.  Tangiang Pangondianon

12.  Marende BE. No. 66 : 1 + 3             “Debata baen donganmi”             BL 52

Debata baen donganmi, lao mangula ulaonmu. Baen Ibana haposanmu,

Sai pasarep rohami. Debata baen donganmi, Debata baen donganmi.

Debata baen donganmi sai na saut do ulaonmu. Sai na tulus do sangkapmu

Jala sonang rohami. Debata baen donganmi, Debata baen donganmi.

13.  Jamita

14.  Marende BE. No. 802 : 1 – 3       “Pangke Tingkim Saonari”        BL. 802            (Papungu Pelean)

Pangke tingkim saonari, dapothon ma Tuhan i. Unang godang sidalian

Ingot jempek ngolumi. Nunga rade hasonangan, di surgo i, di surgo i.

Unang adong nanggo sada na so parjambar disi.

                        ............ M u s i k .............

Suan ma holong ni roha tiru ma Tuhanta i. Las ma roham di gotilan

Jalo ma balos ni i. Nunga rade hasonangan.....d,u......

            ................. M u s i k ...............

Molo taida donganta na sai marungkil tongtong. Unang pasombu sai susa

Togu urupi antong. Nunga rade hasonangan.....d,u..

.................. M u s i k .............

15.  Parsuruon

U:     Hamu angka dongan na hinaholongan! Nunga tibu hian didok Tuhanta: “Haholongan salelenglelengna Hubahen manghaholongi ho, di bahen i Hutogutogu ho marhitehite asi ni roha.” Alani i, pos ma rohamuna, sai na iringiringon ni Tuhan i do hamu di bagasan holong dohot asi ni rohaNa.

H:         Ale Tuhan, sai na pos do rohanami di pangiringiringonMi

U:         Dung i didok Tuhanta: “Ida ma, nunga pola Ahu manguhirhon ho tu bagasan tanganHu duansa.”

H:       Ale Tuhan, pos situtu do rohanami na tongtong paihutihutonMu hami di pardalanan ni ngolunami. Pos situtu rohanami, ndada loasonMu hami lilu di pardalanannami, ala naung di uhirhon Ho hami di tanganMi.

U:         Dung i didok Tuhanta: “Ai nunga tangkas Huboto sangkap angka na Husangkapi taringot tu hamu, sangkap hasonangan do tahe ndada tu hamagoan, asa Ahu mangalehon tu hamu ujung na hinalungunhonmuna.”

H:         Ale Tuhan, pos situtu do rohanami, saluhutna angka na masa na naeng siadopannami, saluhutna i manumpak tu na denggan, hombar tu sangkap ni rohaM.

U:         Jala ingot ma: “Ai ndang adong na so tarpatupa Debata.”

U+H:    Ale Tuhan, naposom do hami; sai saut ma tu hami songon na nidokMi. Amen

U:         Tatangianghon ma Peleanta Tu Debata, martangiang ma hita:....